விஜய்யின் தவெக எனும் இ -காமர்ஸ் நிறுவனம்

இப்போது இ-காமர்ஸ் பலவிதங்களில் உருவாகி பல துறைகளில் வெற்றி நடைபோடுகிறது. அரசியல் மட்டும் இதற்கு விதிவிலக்காக இருக்கமுடியுமா. இங்கேயும் அது வந்துவிட்டது. அதில் ஒன்றுதான் தமிழக வெற்றிக் கழகம்.

அதாவது சிலர் ஏதோ ஒரு பொருளை உற்பத்தி செய்வார்கள், ஆனால் அதை சந்தைப்படுத்தும் உத்தி தெரியாது, அல்லது அந்த அளவுக்கு பலம் இருக்காது. இப்படிப்பட்ட நிறுவனங்கள் பலமாக இருக்கும் நிறுவனங்களுக்கு சந்தைப்படுத்தும் உரிமையை கொடுத்துவிடுவார்கள்.

அந்த முறை கொஞ்சகாலம் வெற்றிகரமாக செயல்பட்டது. இப்போது அதுவும் பழசாகிவிட்டது. இணையம் வந்தபிறகு எல்லோரும் சொந்தமாக ஆன்லைன் கடை போட ஆரம்பித்தார்கள். அதற்கும் வழியில்லாதவர்கள் அமேசான் போன்ற நிறுவனங்கள் மூலம் சந்தைப்படுத்துகிறார்கள்.

அரசியலிலும் இதே நிலைமைதான். இப்போது தலைவர்கள் எதேச்சாதிகாரிகளாக இருக்கிறார்கள். குடும்ப அரசியல் தலைவிரித்து ஆடுகிறது. ஊழல் பணத்தை கொண்டு பிரமாண்ட அரசியல் செய்கிறார்கள். இது மற்ற வளரும் தலைவர்களுக்கு சிரமமாக இருந்தது. எனவே அவர்கள் தனிக்கட்சி ஆரம்பித்தார்கள். இந்த பரிணாம வளர்ச்சி அவர்களுக்கு ஆரம்ப காலத்தில் நல்ல அறுவடையை கொடுத்தது.

சிலர் அதிகாரத்துக்கே வந்தார்கள், சிலர் கிங் மேக்கர் என்ற நிலையை அடைந்தார்கள். மேலும் பலர் போட்ட முதலுக்கு நஷ்டமில்லை என்ற வகையில் சில படிகள் ஏறினார்கள். அந்த டிரெண்ட் தற்போது முடிவுக்கு வந்துவிட்டது.

இப்போது நடப்பது பரிணாம வளர்ச்சியின் அடுத்த கட்டம். காரணம் புதிதாக கட்சி துவங்கியவர்களின் ஆரம்பகட்ட வளர்ச்சியை பார்த்து தோளில் துண்டை போட்டவனெல்லாம் கட்சி ஆரம்பித்தான். இது எல்லோரும் இன்ஜினீயரிங் படித்து கடைசியில் வேலை இல்லாமல் அலைவதுபோல் ஆகிவிட்டது. தற்போது டாக்டர்கள், வக்கீல்கள் என பலர் இப்படியே இந்த Herd mentality ல் சிக்கி தற்போது காற்று வாங்கிக்கொண்டிருக்கின்றனர்.

இன்னொருபக்கம் எதை குடும்ப அரசியல் என்று எதிர்த்தார்களோ , எதை எதேச்சாதிகாரம் என்று சொன்னார்களோ அதையே கட்சியை உடைத்த தலைவர்களும் செய்ய ஆரம்பித்தார்கள். ஆக அந்த மோகமும் முடிந்தது.

இப்படிப்பட்ட நிலையில்தான் விஜய் வருகிறார். அவருடைய நோக்கம் மக்களுக்கு சேவை செய்யவேண்டும் என்பதாக இருக்கலாம். அது அவரால் முடியுமா அல்லது அவர் அதற்கு தகுதியானவர் என்பது வேறு கேள்வி. அதற்கு வேறு ஒரு பதிவை போடவேண்டும்.

அவரிடம் பண பலமும் (அவருடைய தேவைக்கான பணம்) ரசிகர்கள் என்ற பலமும் இருக்கிறது. எனவே வந்துவிட்டார். ஆனால் அவர் கட்சி ஆரம்பித்த நேரம் அரசியலிலும் இ -காமர்ஸ் தேவை என்ற சூழல் அமைந்துவிட்டது.

இனி கட்சி ஆரம்பித்து ஜெயிப்பது சிரமம் என்பதை பல கட்சிகளில் உள்ள இரண்டாம் கட்ட தலைவர்கள் உணர்ந்துவிட்டார்கள். அதே சமயம் தோல்வியை ஏற்றுக்கொண்டு வெளியேறவும் அவர்களுக்கு விருப்பமில்லை. இந்த நேரத்தில் விஜய் வந்திருப்பது அவர்களுக்கு புதிய வாய்ப்பை ஏற்படுத்தி கொடுத்திருக்கிறது. சிறு தலைவர்கள் இவருடைய கட்சியை பயன்படுத்தி தங்கள் வாழ்க்கையை ஓட்டலாம் என்ற முடிவுக்கு வந்திருக்கிறார்கள். 

மற்ற தலைவர்களை போல் இல்லாமல் விஜய் கொஞ்சம் வித்தியாசமாகவும்  இருக்கிறார். பணத்தையும் பார்த்துவிட்டார், வாழ்க்கையையும் நன்றாகவே அனுபவித்திருப்பார். எனவே இனி இவர் கவனம் அவருடைய இலக்கின் மீதே இருப்பதற்கான வாய்ப்பு அதிகம்.

இவர் குடும்ப அரசியலை கொண்டு வரும் வாய்ப்பும் மிக அரிதாகவே இருக்கிறது. அதேசமயம் இவருடைய பேச்சில் அறிவார்ந்த அரசியல் தெரிகிறதா என்று பார்த்தால், இதுவரை எதுவும் காணோம். இருந்தாலும் பெனிபிட் ஆப் டவுட் என்பது இவருக்கு சாதகமாக இருக்கலாம்.

அதிகம் பேசுவதில்லை, மக்களிடம் பழகுவதில்லை என்பதுதான் இவர் மீது உள்ள விமர்சனம். வைகோ, விஜயகாந்த், திருமாவளவன், சீமான் என ஏற்கனவே வாயை வளர்த்த, மக்களிடையே நன்கு பழக்ககூடிய தலைவர்கள் ஜெயித்திருக்கிறார்களா என்று பார்த்தால், அதுவும் இல்லை. அப்படியிருக்கையில் வெற்றிக்கு உதவாத அந்த பார்முலாவை இவர் ஏன் பின்பற்றவேண்டும். ஜெயிக்கும் மனிதர்களிடமிருந்துதானே பாடம் கற்க வேண்டும்.

இவர் இப்படி அமைதியாக, அதிகம் பேசாதவராக இருப்பதால்தான் இவர் ஜெயிப்பாரோ என்ற சந்தேகத்தை ஏற்படுத்துகிறது.

இனி செங்கோட்டையன் கதையை பார்ப்போம். அவர் முன் இருக்கும் பல முடிவுகளில் இப்போது அவர் எடுத்திருப்பதுதான் சிறந்தது. அதாவது அவருடைய பார்வையில்.

எடப்பாடியிடம் அவமானப்பட்டுவிட்டார். இனி அவர் தனிக்கட்சி ஆரம்பிக்க வேண்டும். வயதாகிவிட்டதாலும், அது அவுட் ஆப் பேஷன் என்பதாலும், இன்றய சூழ்நிலையில் அது சாத்தியமில்லை. சாதாரண தலைவராக இருந்தால் திமுகவில் சேர்ந்துவிடலாம். கட்சி தலைமை பதவிக்கே போட்டி போட்ட ஒருவர் அதை செய்யமுடியுமா? அதுவும் முடியாது.

எடப்பாடியிடம் தோற்று கட்சியில் ஒதுங்குவது என்பது அவருக்கு மிகப்பெரிய அவமானம். இதுபோன்ற சூழ்நிலையில் மனிதர்கள் எடுக்கும் ஒரே முடிவு, தான் தோற்றாலும் பரவாயில்லை, தன்னை அவமானப்படுத்தியவர்களை வீழ்த்த வேண்டும் என்பதுதான். அதுதான் இப்போது நடந்திருக்கிறது.

இனி என்ன நடக்கும். சில மாதங்கள் எடப்பாடி தூக்கத்தை தொலைப்பார். அவர் வீட்டுக்கு வரும் கட்சிக்காரர்களுக்கு நல்ல மரியாதையும், காபியும் கிடைக்கும். `அண்ணே நான் மாவட்ட செயலாளர் இல்லண்ணே, நான் சாதாரண வட்ட செயலாளர்தான்னு சொன்னாலும், உங்களுக்கும் அந்த மரியாதை கிடைக்கும். அவர் வீட்டில் பாலே இல்லையென்றாலும் கடையிலயாவது வாங்கி தருவார்.

காரணம் அரசியல் என்பது இரண்டு அணியாக இருந்து கயிறு இழுக்கும் போட்டி. உங்களிடமிருந்து ஒருவன் வெளியேறினால் உங்களுக்கு பலவீனம். அதே ஆள் எதிரி அணிக்கு போனால் அது அதைவிட ஆபத்து. எனவே இங்கே இழப்பு என்பது Double whammy.

சரி, செங்கோட்டையன் தவெக சென்றதால் என்ன நடக்கும்?

இதற்கு நாம் கிரிக்கெட்டைதான் இழுக்க வேண்டும். கடைசி ஓவர். கடைசி பந்து. ஆறு ரன் வேண்டும் என்ன செய்வீர்கள். கண்ணை மூடிக்கொண்டு பேட்டை தூக்க வேண்டியதுதான். சிக்ஸ் என்றால் நீங்கள் கதாநாயகன். தோற்றாலும் பிரச்சினை இல்லை. காரணம் இது போன்ற சூழ்நிலையில் நாம் ஜெயிக்கமாட்டோம் என்ற மனநிலைக்கு எல்லோரும் வந்திருப்பார்கள்.

சில நேரங்களில் சில சம்பவங்கள் மேலும் பல சம்பவங்களுக்கு பிள்ளையார் சுழியாக இருக்கும். ஒரு வேளை இந்த சம்பவம் காரணமாக மேலும் பல இணைப்புகள் நடந்து தவெக ஜெயித்தால், அல்லது அதிமுகவை மூன்றாம் இடத்துக்கு தள்ளிவிட்டால், எடப்பாடி எட்டு நாளைக்கு தூங்கமாட்டார்.

இங்கே நீதி என்னவென்றால், திறமைக்கு மரியாதையும் அங்கீகாரமும் வேண்டும். அது எடப்பாடிக்கு கிடைத்திருக்கிறது. அதேசமயம் விசுவாசத்திற்கும் சில மரியாதைகள், பரிசுகள் உண்டு. அது அவர்களுக்கு கொடுக்கப்பட வேண்டும். கொடுக்கப்படாவிட்டால் இப்படித்தான் நடக்கும்.